Holwierde


Alles was ter

Dou wie hier in Holwier kwamen was dat in achtendatteg. Wat waren hier dou toch n zoaken. Drij brandstofhandeloaren: Haarm Kool, Hinderk Toxopeus en Kloas Brontsemoa, zwaarde Kloas. Din haren wie ook n petreulieboer, Tidde Poapst. Ik zai hom nog deur t dorp riedn mit n klipke aan t stuur. Din haar e wat vergeten en din mos e dij nog aargens hin brengen. Mor wie haren t over zoaken. Mien bruier zee n moal tegen mie: “Hier zit gain dokter op houk, mor aans is dizze houk n ploats op zuk zulf. Konst nait opbedenken wat ter nait was. Alles: Hinderk Toxopeus, brandstof. n Kroug en n winkel. Koeper Mulder, dus als je dood gingen kon je ook n kist bestellen. Liekkistenmaggesien haar e der ook bie. In wintertied sleep e dien scheuvels. En doar n winkel en bie Kloas Mulder konst melk kriegen en din haarst Norden en lapkekoopman Van Bruggen. Doarnoast hastoe ol Kampke, dij was snieder. Dat hoes is kapot kommen in oorlog. Janske Danhof was bakker. Doar tegenover Van Bergen, dij was schilder. En hier n kapper en doar n smid en n schounmoaker. Alles was hier. Piet zee tegen mie: “Ik heb nog nooit op zo‘n klaine oppervlakte zoveul zoaken zain.” Doar verwonder ik mie nog over hou dat dat kon. Want wie zeden: “Alles was ter.”